Ազգային ժողովի «Բարգավաճ Հայաստան» խմբակցության պատգամավոր Միքայել Մելքումյանը մարդու իրավունքների ոլորտում Հայաստանի ստանձնած միջազգային պարտավորությունների մասին հիշեց այնքան ժամանակ, քանի դեռ հարց չէր հնչեցվել ԼԳԲՏԻ անձանց իրավունքների վերաբերյալ:
Մելքումյանի հետ LGBTnews-ի հարցուպատասխանը ներկայացնում ենք ստորև:
– Պարո՛ն Մելքումյան, Հայաստանում հակախտրական օրենքի ընդունման անհրաժեշտություն տեսնո՞ւմ եք:
Որ մեր հասարակությունը հետագա ժողովրդավարացման կարիք ունի՝ փաստ է, որ ասեմ, թե քաղաքի և գյուղի միջև տարբերությունները վերացած են՝ այդպես չէ, որ ասեմ, թե շատ ռադիկալ ժողովրդավարական ենք՝ ո՛չ, բայց որ ասեմ՝ ռասիստական մոտեցումներ ունենք՝ դարձյալ այդպես չէ. հայերս այդ առումով օրինապահ ենք, և այդպիսի արյունարբու բաներ չկան մեր մեջ:
Որ ասեմ՝ տարբեր աղանդների, սեռական փոքրամասնությունների նկատմամբ ինչպիսին է իմ դիրքորոշումը… Ես կոշտ դիրքորոշման կողմնակից եմ`լինելով որոշակի արժեքների կրող: Պետք է շատ լուրջ վերլուծություն անել ու հասկանալ` նման օրենքի անհրաժեշտություն կա՞, թե՞ չկա: Այնպես չլինի, որ ինչ-որ օրենք ընդունենք`բարի նպատակներով, բայց ստացվի մեռած, չգործող օրենք: Օրենքը պիտի բխի հասարակական պահանջի ռեալ գնահատումից: Այսինքն՝ եթե մենք տեսնում ենք, որ նման օրենք ունենալու լուրջ պահանջ կա, ապա այդ օրենքը պետք է ունենալ, իսկ եթե չկա… Դա լուրջ սոցիոլոգիական, հոգեբանական, մարդաբանական վերլուծությունների կարիք ունի: Մինչև այս ամենը չունենանք՝ չենք կարող ասել: Եթե ասեմ, որ այս պահին ես այդ օրենքի շատ լուրջ անհրաժեշտություն եմ տեսնում… Միանշանակ պատասխան չունեմ:
– Դուք նշեցիք, որ կոշտ դիրքորոշում ունեք «աղանդների, սեռական փոքրամասնությունների» վերաբերյալ:
– Այո՛, բնականաբար, տարբեր աղանդների նկատմամբ իմ դիրքորոշումը կոշտ է:
– Որպես պատգամավոր արտահայտո՞ւմ եք, և եթե այո, ապա ինչպե՞ս եք արտահայտում ձեր կոշտ վերաբերմունքն այդ անձանց նկատմամբ:
– Օրենքի առաջ բոլորը հավասար են: Ես դեմ եմ, որ ինչ-որ անձինք ինչ-որ աղանդի պատկանելությամբ պայմանավորված՝ չեն ծառայում բանակում: Ես ինքս օրինապահ մարդ եմ, բայց կարող եմ որոշ մարդկանց նկատմամբ նեգատիվ վերաբերմունք ունենալ, և դա չի նշանակում, որ պիտի գնաս ու նրանց, օրինակ, ծեծես:
– Ձեր վրա՝ որպես պատգամավորի, ավելի շատ պարտավորություններ են դրված. դուք պարտավոր եք պաշտպանել այդ անձանց իրավունքները:
– Տարբեր երևույթների նկատմամբ ես կարող եմ ունենալ մերժելի վերաբերմունք, բայց դա չի նշանակում, որ պետք է այդ ամենի վերաբերյալ կոշտ արտահայտվեմ. պարզ է, որ օրենքի առջև բոլորս հավասար ենք և պետք է պահպանենք օրենքը: Մենք միջազգային տարբեր պարտավորություններ ունենք: Այսինքն՝ որպես քաղաքակիրթ անձինք մենք պետք է արտաքուստ պահպանենք ձևը, բայց ներքուստ, բնականաբար, մերժելի շատ բաներ ունենք, դա ամեն մարդու անհատական կարծիքն է:
– ԼԳԲՏԻ անձինք ամենաշատն են խտրական վերաբերմունքի արժանանում:
– Եկեք չկենտրոնանանք այդ անձանց վրա: Ես ինչքան որ ասացի՝ բավարար է:
– Հայաստանում այդ անձանց նկատմամբ խտրական վերաբերմունքն ամենասուրն է արտահայտվում:
– Այդ թեմայով հարցի չեմ պատասխանում:
– Ձեր կարծիքով՝ ԼԳԲՏԻ անձինք ՀՀ այլ քաղաքացիների հետ հավասար պե՞տք է ունենան ամուսնանալու իրավունք:
– Ուֆ-ուֆ, ուֆ-ուֆ: Ես ասում եմ, որ այդ երևույթի նկատմամբ խիստ բացասական վերաբերմունք ունեմ:
– Այսինքն՝ կարո՞ղ եմ ենթադրել, որ ԼԳԲՏԻ անձինք, ըստ ձեզ, չպիտի ունենան ամուսնանալու իրավունք:
– Ես ասացի, որ բացասական վերաբերմունք ունեմ այդ երևույթի նկատմամբ: Չեմ բացում քարտերը: Խիստ բացասական, վե՛րջ:
– Այսպիսով հենց խտրական վերաբերմունք չե՞ք ցուցաբերում այդ անձանց նկատմամբ:
– Թող ցուցաբերվի, խնդիր չկա:
– Այդ դեպքում ինչո՞ւ ենք հակախտրական օրենք մշակում, եթե անգմա ԱԺ-ում ունենք պատգամավորներ, որոնք խտրական վերաբերմունք ունեն այս կամ այն խմբի նկատմամբ, եթե, ինչպես դուք նոր ասացիք, խնդիր չկա խտրական վերաբերմունք ցուցաբերելու մեջ:
– Ես ասում եմ, որ որպես անհատ մերժում եմ այդ երևույթները, բայց եթե օրենքը նրանց տալիս է ինչ-որ բաներ անելու իրավունք՝ թող անեն:
– Դուք պատգամավոր եք և դուք եք ընդունում օրենքները: Որպես պատգամավոր ինչպե՞ս կքվերակեք ԼԳՏԲԻ անձանց իրավունքների իրացումն ապահովող օրինագծերին:
– Պիտի օրինագիծը լինի՝ ծանոթանամ: Վերջացրի՛նք, վե՛րջ, էլ հարցերի չեմ պատասխանում:
