ՀՅԴ֊ական պատգամավորը «նորմալ աչքով չի նայում» ԼԳԲՏԻ մարդկանց

LGBTnews-ը շարունակում է Ազգային ժողովի պատգամավորների հետ հարցազրույցների շարքը՝ պարզելու համար նրանց դիրքորոշումը ԼԳԲՏԻ մարդկանց իրավունքների վերաբերյալ։ Այս անգամ մեր զրուցակիցն է ՀՅԴ խմբակցության պատգամավոր Սուրեն Մանուկյանը։ 

֊ Պարո՛ն Մանուկյան, ձեր կարծիքով`Հայաստանում խտրականության դրսևորումները շա՞տ են. արդյոք կա՞ որևէ հիմքով պայմանավորված խտրկանություն, որը ձեզ ամենաշատն է մտահոգում:

֊ Ես այդպիսի հարցերից ընդհանրապես տեղյակ չեմ, որ ինչ-որ մեկի նկատմամբ խտրական վերաբերմունք լինի։

֊ Դուք պատգամավոր եք, ձեզ երբևէ որևէ քաղաքացի չի՞ դիմել ՝ հայտնելով, որ խտրականության է ենթարկվել։

֊ Ես երբ որպես պատգամավոր ժողովրդի հետ շփվում եմ՝ նման խտրական վերաբերմունք չկա ժողովրդիս հետ: Ես բոլորին էլ նույն աչքով եմ նայում, իսկ մնացած բնագավառներում թե որտեղ կա խտրականություն կամ չկա՝ ես տեղյակ չեմ, ինձ նման հարցերով չեն դիմել:

֊ Ձեր կարծիքով՝ բոլոր քաղաքացիների համար՝ անկախ ցանկացած հանգամանքից, պետք է՞ ապահովել հավասար պայմաններ:

֊ Դա Հայաստանի Սահմանադրության պահանջն է:

֊ Իսկ Հայաստանի Հանրապետությունն ապահովո՞ւմ է պայմաններ, որ մարդիկ իրացնեն իրենց սահմանադրական իրավունքները:

֊ Միանշանակ չեմ կարող ասել, որ հարյուր տոկոսով ապահովում է, բայց քայլեր կարվեն, արվում են ու ժամանակի ընթացքում նման հարցերը կարգավորվում են: Ցանկացած զարգացած երկրում էլ այդ լիակատար հավասարությունը չկա:

֊ ԼԳԲՏԻ մարդիկ Հայաստանում, թերևս, ամենաշատ խտրականության ենթարկվող խումբն են: Դուք պատրա՞ստ եք նրանց իրավունքները պաշտպանել: 

֊ Մեր ժողովուրդը պատրաստ չէ նույնասեռական անձանց նորմալ աչքով նայել:

֊ Դուք՝ որպես պատգամավոր, նրանց «նորմալ աչքով» նայո՞ւմ եք, թե՞ ոչ:

֊ Իհարկե ոչ:

֊ Այսինքն՝ կարելի է ենթադրել, որ եթե նրանց իրավունքներն իրացնելու վերաբերյալ որևէ օրենքի նախագիծ լինի Ազգային ժողովում, ենթադրենք՝ նույնասեռ ամուսնության վերաբերյալ, դուք դե՞մ եք քվեարկելու:

֊ Ես չեմ կարող այս պահին ասել՝ դեմ կքվեարկեմ, թե կողմ, երբ այսպիսի քննարկում լինի՝ դրա ընթացքում արդեն որոշումս կկայացնեմ:

֊ Բայց այս պահին դուք պատրաստ չեք նրանց, ինչպես դուք ասացիք, «նորմալ աչքով նայել»․․․

֊ Հնարավոր է, որ կողմ էլ քվեարկենք, դեմ էլ քվեարակենք:

֊ Դուք ասում եք, որ «նորմալ աչքով» չեք նայում նույնասեռական մարդկանց։ Ձեր կարծիքով՝ դուք որևէ առավելություն ունե՞ք ԼԳԲՏԻ մարդկանց նկատմամբ:

֊ Իրավակա՞ն տեսանկյունից:

֊ Ցանկացած տեսանկյունից:

֊ Իրավական տեսանկյունից Սահմանադրությունն էլ է ասում, որ մարդիկ հավասար են:

֊ Իսկ ի՞նչ տեսանկյունից ունեք առավելություն։

֊ Դե, իրավական առումով եք հարցնում՝ իրավական առումով եմ ասում: Այլ բան չեմ ասի։