Շուռնուխ գյուղի միջադեպի վերաբերյալ նյութեր են նախապատրաստվում. Ոստիկանություն

Շուռնուխ գյուղում երեկ տեղի ունեցած միջադեպի կապակցությամբ կան բերման ենթարկվածներ, նշանակվել է տուժողների դատաբժշկական փորձաքննություն, դեպքի առնչությամբ նախապատրաստվում են նյութեր, հայտնում է Ոստիկանությունը։

Ոստիկանության կայքում տեղադրված հայտարարության մեջ ասվում է. «Զանգվածային լրատվության միջոցներում տեղեկատվություն է տարածվել, թե օգոստոսի 3-ին, ժամը 20.00-ի սահմաններում Սյունիքի մարզի Շուռնուխ գյուղում ավելի քան 30 մարդ հարձակվել են ԼԳԲՏ 9 ակտիվիստի վրա և ծեծել: 

Հայտնում ենք, որ օգոստոսի 3-ին, ժամը 20.30-ի սահմաններում, ոստիկանության Երևան քաղաքի վարչության օպերատիվ կառավարման կենտրոնից Գորիսի բաժին հաղորդում է ստացվել, որ իրենց է զանգահարել Հայկ Հ.-ն և հայտնել, որ երկու տղամարդ եկել և ցանկանում են պարզաբանումներ կատարել իրենց հետ, խնդրում է ոստիկան մոտենա:
Մեկնած օպերատիվ խումբը պարզել է, որ օգոստոսի 3-ին, ժամը 20.00-ի սահմաններում, Շուռնուխ գյուղի մի խումբ բնակիչներ 1997 թ. ծնված Հայկ Հ.-ից և նրա ընկերներից պահանջել են հեռանալ գյուղից՝ պատճառաբանելով, որ վերջիններս համասեռամոլներ(ձևակերպումը՝ ոստիկանության պարզաբանման-խմբ.) են, այնուհետև նրանց միջև առաջացել է վիճաբանություն, որի ընթացքում գյուղացիներից ոմանք ծեծի են ենթարկել Հայկ Հ.-ին ու նրա ընկերներին:

Չորս անձինք մարմնական վնասվածքներով տեղափոխվել են հիվանդանոց` բուժօգնության, այնուհետև ոստիկանության ծառայողները, ապահովելով նրանց անվտանգությունը, ուղեկցել են դեպի Երևան:

Կան բերման ենթարկվածներ: Դեպքի բոլոր հանգամանքները պարզվում են: Նշանակվել է ԴԲՓ: Նախապատրաստվում են նյութեր»:

Հիշեցնենք, որ երեկ՝ օգոստոսի 3-ին, Սյունիքի մարզի Շուռնուխ գյուղում մի քանի տասնյակ մարդ հարձակվել էր այդ տարածքում գտնվող թվով 9 ԼԳԲՏԻ ակտիվիստների վրա, ինչի հետևանքով նրանք մարմնական վնասվածքներ են ստացել, եղել են հոսպիտալացվածներ: