Շտապել պետք չէ․ պետք է լուրջ բացատրական, լուսավորչական աշխատանք․ Բորիս Նավասարդյան

  1. LGBTnews-ի զրուցակիցն է Երևանի մամուլի ակումբի ղեկավար Բորիս Նավասարդյանը:

֊ Պարո՛ն Նավասարդյան, Հայաստանում տեղի ունեցած վերջին իրադարձություններն ինչպիսի՞ ազդեցություն են ունեցել կամ ունենալու ԼԳԲՏԻ անձանց, նրանց խնդիրների վրա:

֊ Հիմնական փոփոխությունը, որ տեղի է ունեցել, այն է, որ հարցին շատ ավելի հանգիստ ու առողջ մոտեցում կա: Մինչև իշխանափոխությունը հին կառավարությունը և իշխող կուսակցությունն արհեստականորեն էին այդ թեման բարձրացնում, որ հասարակությանը շեղեն իրական պրոբլեմներից և որ կարողանան «հարձակվել» իրավապաշտպան կազմակերպությունների վրա: Իշխանություններին, բնականաբար, դուր չէր գալիս իրավապաշտպան կազմակերպությունների քննադատությունը: Այժմ պահն է, երբ իրավապաշտպանները և ժողովրդավարական մոտեցում ունեցող մարդիկ կարող են կոնստրուկտիվ և հետևողականորեն կատարել իրենց աշխատանքը` նաև հաշվի առնելով հանրային կարծիքը, հանրության ընդհանուր տրամադրվածությունը: Իրավիճակը և՛ պրակտկայում, և՛ օրենսդրական կարգավորման առումով հնարավորություն է տալիս հասնել այնպիսի փոփոխությունների, որոնք համարյա կոնսենսուսային մակարդակով լուծումներ կլինեն:

֊ Այսինքն` դուք հնարավո՞ր եք համարում, որ այն խնդիրները, որոնք կան ԼԳԲՏԻ մարդկանց իրավունքների հետ կապված, որոշ ժամանակ անց կարող են լուծումներ ստանալ: Որքա՞ն ժամանակ է դրա համար անհրաժեշտ:

֊ Ես կարծում եմ, որ հստակ առաջնահերթություններ կան, որոնց վրա այսօր պետք է կենտրոնանալ՝ չարաշահումների և կոռուպցիայի դեմ պայքարը, արտահերթ ընտրությունների մաքուր անցկացումն ու քաղբանտարկյալների հարցը. ահա այն երեք առաջնահերթությունը, որոնք մարդկանց մտահոգում են: Ամբողջ ուշադրությունն այդ երեք ուղղությունների վրա է, բայց քանի որ ընդհանուր իրավիճակը և հասարակական տրամադրություններն այնպիսին են, որ, կարելի է ասել, ունենք հասարակական համաձայնություն, մյուս հարցերի սրությունը նվազել է, այդ հարցերը հանգիստ քննարկելով և չակնկալելով, որ արագ լուծումներ կգտնվեն, կարելի է գնալ առաջ: Օրենսդրական կարգավորումներին պետք է շատ լուրջ մոտենալ, քննարկումների և երկխոսության միջոցով լուծումներ գտնել, այստեղ է, որ շտապել պետք չէ, պետք է լուրջ բացատրական, լուսավորչական աշխատանք կատարել բնակչության շրջանում, և ինձ թվում է, որ հետագայում այդ ամենը կօգնի քաղաքականության և օրենսդրական մակարդակով այնպիսի մոտեցումներ մշակել, որոնք ընդունելի կլինեն հանրության մեծամասնության համար, կապահովեն բոլոր քաղաքացիների, այդ թվում՝ ԼԳԲՏԻ անձանց իրավունքներն ամբողջությամբ:

֊ Դուք մտավախություն չունե՞ք, որ իշխանությունն, այնուամենայիվ, այս հարցում տուրք կտա հասարակական տրամադրություններին ու քայլեր չի ձեռնարկի ԼԳԲՏԻ անձանց իրավունքների հետ կապված խնդիրների լուծման ուղղությամբ:

֊ Ես ունեմ որոշակի մտավախություններ, բայց դրանք ավելի շատ ընդհանուր բնույթի են, մտավախություններ, որ շատ հարցերին միգուցե այդքան էլ ցանկություն չկա անդրադառնալու՝ հաշվի առնելով կառավարության անդամների և կառավարական օղակների զբաղվածությունը: Բայց երբ մեր ամբողջ քաղաքական կյանքը բնականոն հունի մեջ կլինի, այդ ժամանակ քաղաքացիական հասարակության ակտիվությունը, հարցերի ադեկվատ բարձրաձայնումը կապահովեն նաև իշխանությունների հավասարակշռված ու պատասխանատու մոտեցումները: Դա անխուսափելի է, քանի որ քաղաքացիական հասարակության ազդեցությունը Հայաստանում, կարծում եմ, բավականին մեծ է լինելու մոտակա տարիների ընթացքում:

֊ Լրատվամիջոցների աշխատանքում արդեն նկատո՞ւմ եք դրական փոփոխություն՝ կապված ԼԳԲՏԻ մարդկանց խնդիրների լուսաբանման հետ:

֊ Ես կարծում եմ, որ նախկինում այդ թեմային անդրադարձը ԶԼՄ-ներում ածանցյալ էր քաղաքական սպեկուլյացիաների, որոնք կային: Այսօր այդ սպեկուլյացիաներն ավելի քիչ են, և տեղեկատվական դաշտի մոտեցումն այդ հարցին ևս ավելի մեղմ ու հանդուրժող է, թեև, իհարկե, կան դրսևորումներ, որոնց վրա պետք է ուշադրություն դարձնել ու բացառել որևէ խտրականություն լրատվամիջոցների գործունեության մեջ: