Պատգամավորը ԼԳԲՏԻ մարդկանց համեմատում է վիրուսի հետ և առաջարկում մեկուսացնել

LGBTnews-ը շարունակում է Ազգային ժողովի պատգամավորների հետ ԼԳԲՏԻ մարդկանց իրավունքների վերաբերյալ հարցազրույցների շարքը։ Այս անգամ մեր զրուցակիցն է «Ծառուկյան» խմբակցության պատգամավոր, ԱԺ տնտեսական հարցերի մշտական հանձնաժողովի անդամ Վարդան Բոստանջյանը։

– Պարո՛ն Բոստանջյան, միջազգային և մի շարք հայաստանյան կառույցներ բարձրաձայնում են Հայաստանում խտրկանանության առկայության մասին: Կիսում ե՞ս կարծիքը, որ Հայաստանում խտրականություն կա:

֊ Իմ կարծիքով, միգուցե անգամ համոզմամբ` Հայաստանի Հանրապետությունը, հայ մարդիկ նրանք են, որոնք խտրական մոտեցում չեն դրսևորում: Ես խտրական մոտեցում չեմ տեսնում ազգերի նկատմամբ, երևույթների նկատմամբ: Անձամբ ես ռասայական խտրականություն, ազգային խտրականություն և նմանատիպ երևույթներ չեմ պատկերացնում:

֊ Դուք թվարկում եք խոցելի խմբեր և նշում, որ նրանց նկատմամբ, փաստորեն, խտրականություն չեք տեսնում։ Հայաստանում ամենախոցելի խմբերից մեկը ԼԳԲՏԻ մարդիկ են: Նրանց նկատմամբ և՞ս չեք տեսնում խտրական վերաբերմունք:

֊ Դրա վերաբերյալ… Ես հետամնաց մարդ եմ, չեմ ուզում լսել այդ մասին:

֊ Ինչո՞ւ:

֊ Ես չեմ կարող, հակված էլ չեմ բացատրել, թե ինչու: Ես հասկանում եմ, որ աստված ստեղծել է տղամարդուն և կնոջը` որպես այդպիսին․․․ Միշտ մտածում եմ, որ նման բաների առաջացումն անոմալ երևույթ է, և այս անոմալ երևույթը չի կարող ինձ համար ընկալելի և ընդունելի լինել:

֊ Ի՞նչն է անոմալ: Ավելի հստակ կբացատրե՞ք, թե ձեր ընկալմամբ սեռական կողմնորոշումը, գենդերային ինքնությունն առհասարակ ինչ է:

֊ Ես չեմ ուզում այս մասին խոսել:

֊ Դուք թվարկում եք մյուս խոցելի խմբերն ու ասում, որ նրանց նկատմամբ խտրկանություն չեք տեսնում: Ես ցանկանում եմ տեղեկանալ` այս խոցելի խմբի մասին ի՞նչ եք մտածում:

֊ Դա երբեք պետք չէ խտրականության համատեքստում տեսնել: Իմ կարծիքով` դա նշանակում է հանդուրժողական լինել հիվանդության վերաբերյալ, ընդ որում արհեստածին, այլ ոչ թե բնածին հիվանդության, որն արդյունք է մարդու ուղեղի դեֆորմացիայի: Ես հասկանում եմ, որ նման մարդիկ պետք է հնարավորինս հեռու լինեն հասարակության նորմալ անդամներից և եթե հնարավոր է՝ նաև բուժվեն:

֊ Նույնասեռական լինելը հիվանդություն չէ։ Բայց դա մի կողմ թողնենք։ Ձեր խոսքից ենթադրվում է, որ դուք առհասարակ առողջական խնդիր ունեցող մարդկանց հասարակությունից մեկուսացնելու կողմ եք․․․

֊ Ես դրա համար ասում եմ՝ հիվանդության տեսակներ կան, որոնց դեպքում պետք է մեկուսացնել, չեմ ասում՝ բոլոր հիվանդությունների դեպքում։ Ու չեմ ասում՝ ոչնչացնել, ասում եմ՝ մեկուսացնել։

֊ Այսինքն` ձեր ընկալմամբ նույնասեռական լինելը հենց այդպիսի հիվանդություն է և նույնասեռական անձանց պետք է մեկուսացնե՞լ: 

֊ Այո՛, իմ կարծիքով հենց այդպիսին է:

֊ Այս պահին` այս հարցազրույցը տալիս, դուք խտրական վերաբերմունք եք դրսևորում ԼԳԲՏԻ մարդկանց նկատմամբ:

֊ Ո՛չ, ես կրկնում եմ, որ սա խտրականության դաշտում չի տեղավորվում, սա խտրականության ինստիտուտի դաշտում քննարկվող հարց չէ: Սա երբեք խտրականություն չէ: Դու կարող ես կարեկցել այդ մարդուն, կարող ես ցանկանալ, որ ինքը բուժվի, դուրս գա այդ իրավիճակից:

֊ Դուք կարծում եք, որ սեռական կողմնորոշումը, գենդերային ինքնությունը բուժվո՞ւմ է:

֊ Չեմ կարող ասել, ինքս երևույթին բացասական եմ նայում:

֊ Դուք, փաստորեն, ԼԳԲՏԻ մարդկանց վերաբերող խնդիրներն առհասարակ խտրականության դաշտում քննարկման ենթակա հարց չեք համարում, մյուս ոլորտներում էլ խտրականություն չեք տեսնում. ճի՞շտ եմ ընկալում ձեր դիրքորոշումը:

֊ Այո՛, ճիշտ եք:

֊ Դուք նաև ասում եք, որ ԼԳԲՏԻ֊ները հիվանդ մարդիկ են: Թեև դա այդպես չէ, ինչը փաստված է գիտական հանրության կողմից, այնուամենայիվ ես ցանկանում եմ հստակեցնել ԼԳԲՏԻ անձանց նկատմամբ ձեր դիքորոշումը՝ ձեր ընկալման շրջանակներում: Ձեր կարծիքով՝ առողջական խնդիրներ ունեցող մարդիկ պե՞տք է ունենան ամուսնանալու, սիրելու, սիրվելու, երջանիկ լինելու և այլ հնարավորություններ, ինչպես մյուս քաղաքացիները:

֊ Դե, այդ իրավունքները համամարդկային են, որոնք պետք է պաշտպանել և ապահովել:

֊ Ուրեմն՝ ինչպես մյուս անձինք, այնպես էլ՝ ԼԳԲՏԻ մարդիկ պետք է ունենան մարդու իրավունքներն ու ազատություններն իրացնելու հնարավորություն, եթե դուք անգամ նույնասեռական լինելը առողջական խնդիր համարեք․․․

֊ Ձեր թվարկած ուղղություններով մարդկանց դեպքում դա իրավունքի ինստիտուտի հետ կապ չունի:

֊ Իմ նշած մարդիկ կան հասարակությունում՝ անկախ ձեր ցանկությունից, նրանք նույնպես մարդիկ են և հետևաբար ի ծնե ունեն անքակտելի իրավունքներ: Դուք, սակայն, նրանց իրավունքները չեք դիտարկում մարդու իրավունքների համատեսքտում և նրանց չեք ընկալում որպես հասարակության լիիրավ անդամ: Այդ դեպքում ի՞նչ եք առաջարկում անել։

֊ Դե, միայն այն պատճառով, որ նրանք ընդհանուր հասարակությունից տարբերվում են, նրանց իրավունքները համապատասխան չափով պետք է կրճատվեն: Նրանք պետք է չունենան այն բոլոր իրավունքները, որ ունեն սովորական մարդիկ:

֊ Այսինքն`ձեր խոսքից կարելի է եզրակացնել, որ, օրինակ, հաշմանդամության խնդիր ունեցող անձանց, ազգային, կրոնական փոքրամասնությունների իրավունքները ևս պետք է համապատասխան չափով կրճատել, որովհետև նրանք ևս ինչ֊որ հատկանիշով տարբերվում են հասարակության մեծ մասից։

֊ Ո՛չ, նրանց հնարավորություններն արդեն իսկ կրճատված են. այն մարդը, որը գամված է սայլակին, չի կարողանա քայլել, որքան էլ մենք կամենանք, որ ինքը կարողանա, հետևաբար ինքնըստինքյան նրա իրավունքը սահմանփակվում է:

֊ Ձեր նշած օրինակի դեպքում ենթադրվում է, որ խոցելի խմբի համար հավասար հնարավորություն պետք է ստեղծել, ինչն էլ քաղաքակիրթ հասարակություններն անում են՝ թեքահարթակներ են կառուցում, հանրային տրանսպորտը հարմարեցնում են նրանց կարիքներին և այլն, բայց դուք, փաստորեն, հակառակը, ասում եք, որ խոցելի խմբի իրավունքները պետք է կրճատել, քանի որ նրանց տարբերվում են հասարակությունից:

֊ Մենք այստեղ արդեն բառախաղով ենք զբաղվում: Գոյություն ունեն բնածին իրավունքներ և բստրածին իրավունքներ: Հիմա նույն ձևով ես կարող եմ ասել, որ մարդասպանը մեղավոր չէ, քանի որ իր ուղեղի մեջ մարդ սպանելու ցանկություն է առաջանում և պնդեմ, որ չի կարելի ոտնահարել նրա՝ մարդ սպանելու իրավունքը: Դուք դա եք ասում:

֊ Ես դա չեմ ասում, մարդասպանությունը հանցանք է, նույնասեռականությունը` ոչ:

֊ Ինչո՞ւ։ Որ մարդասպան բառը չենք օգտագործում՝ նշանակում է, որ տղամարդը կարող է տղամարդու հետ ամուսնանա՞լ: Թող ամուսնանա․․․ Այդ ձևի մարդկանց պետք է հեռու պահել հասարակությունից:

֊ Դուք սիրելը համարո՞ւմ եք բնական բան:

֊ Իհարկե, սիրելը բնական իրավունք է: Բայց տղամարդը տղամարդուն սիրի՞:

֊ Ձեր ի՞նչ գործն է, թե ով ում կսիրի։

֊ Տեսնո՞ւմ եք, որ մեր խոսակցությունը չի ստացվում:

֊ Ես պարզապես ցանկանում եմ հասկանալ ձեր՝ Ազգային ժողովի պատգամավորի դիրքորոշումը հասարակության մի խմբի նկատմամբ և ներկայացնել այն ընթերցողին: Իմ հարցը պարզ է. ձեր կարծիքով, օրինակ, տղամարդու սերը տղամարդու հանդեպ պետք է արգելվի՞:

֊ Ախր սոփեստության մեջ դուք չեք կարող հասկանալ: Ես ասում եմ, որ դուք անձանց համար ձևավորում եք իրավունք, որը երբեք իրավունք չի կարող լինել:

֊ Ինչո՞ւ չի կարող:

֊ Որովհետև նրանք, դուրս գտնվելով ընդհանուր սկզբունքներից ու մոտեցումներիցդադարում են դառնալ այնպիսին, ինչպիսին սովորական մարդն է, ուստի մարդու բնականոն իրավունքները վերցնելու և նույնասեռական անձանց վրա տարածելու իրավունք չունենք, որովհետև իրենք, հասկանո՞ւմ եք, ուրիշ սուբյեկտ են:

֊ ԼԳԲՏԻ անձինք մարդիկ են և նրանց վրա նույնպես տարածվում են մարդու իրավունքները, դրանք անքակտելի են մարդուց, դուք ինչպե՞ս եք տարանջատում։ Կարո՞ք եք ասել, թե ձեր առավելությունը նրանց համեմատ ո՞րն է:

֊ Ես չեմ ասում, որ իրենք ինձնից ավել կամ պակաս են: Ես պարզապես ասում եմ, որ դուք ինձ հետ գործ չունեք: Դա էլ իմ իրավունքն է, չէ՞:

֊ Մեկուսացվե՞ն հասարակությունից:

֊ Ջհանդամի՛ն: Բերեմ՝ ծո՞ցս քնացնեմ, չեմ հասկանում: Ի՞նչ եք դուք ասում:

֊ Ձեզ որևէ մեկը չի առաջարկում ԼԳԲՏԻ մարդկանց ձեր ծոցում պահել:

֊ Բա ի՞նչ անեմ, ասեք՝ ի՞նչ պիտի անեմ:

֊ Դուք Ազգային ժողովի պատգամավոր եք: Եթե Ազգային ժողովում ԼԳԲՏԻ մարդկանց իրավունքների իրացման վերաբերյալ որևէ օրինագիծ լինի, դուք կմերժե՞ք այդ օրինագիծը, դե՞մ կքվեակեք, թե՞ կողմ:

֊ Իհարկե կմերժեմ, ես տեղնուտեղը կմերժեմ: Մեր երկիրը փչացնող ինչ-որ մեկը ուզում է… Ձեզ գրանտնե՞ր են տալիս, որ այս ամենն անեք: Համաձայն դավադրությունների տեսության՝ փչացնում են մեր երկիրը: Ձեզ էլ երկու-երեք կոպեկ փող են տալիս, որ մեր նման մարդկանց բռնացնեք, գաք, այսպիսի հարցեր տաք:

֊ Ես հասարակության անդամ մարդկանց խնդիրների մասին հարցեր եմ ընդամենը հղում պատգամավորին, որը կոչված է ծառայելու այդ հասարակությանը:

֊ Ես ուզում եմ ասել՝ Հայաստանի Հանրապետությունում այդ ամենի մասին մի՛ խոսեք։ Կմեռնենք, կպրծնենք, դրանից հետո ինչ տեղի է ունենում՝ թող տեղի ունենա:

֊ Մի շարք երկրներում ԼԳԲՏԻ մարդկանց իրավունքները պաշտպանվում են և այդ երկրներն ամենևին չեն փչանում, հետընթաց չեն ապրում, ավելին՝ բոլոր ցուցանիշներով ամենազարգացած պետություններն են։ Դուք չե՞ք ուզում, որ Հայաստանը քաղաքակիրթ ու ուժեղ պետություն լինի։

֊ Ես թքել եմ այդ երկրների վրա: Ես դրա համար եմ ասում՝ հա՛, ես հետամնաց մարդ եմ: Ձեր ասածն ահավոր հակամարդկային հիվանդություն է: Ես կուզենայի, որ Հայաստանի Հանրապետությունում այդ բանը չլինի: Հիմա ես եմ ձեզ հարց տալիս՝ ո՞նց էր, որ առաջ Հայաստանի Հանրապետությունում նման բան գոյություն չուներ, իսկ հիմա ունի, սարսափելի շատացել են:

֊ ԼԳԲՏԻ մարդիկ միշտ ու բոլոր հասարակություններում եղել են ու կան, պարզապես նախկինում նրանցից շատերը ստիպված են եղել թաքնվել, քանի որ հակամարդկային քաղաքական ռեժիմների պայմաններում են ապրել։

֊ Այո՛, դուք պատասխանեցիք իմ հարցին։ Մարդկության ծնված օրվանից այդ երևույթը եղել է, բայց մարդկությունը նպատակահարմար չի գտել դա ի ցույց դնել:

֊ Բայց մարդկությունը բարեբախտաբար զարգանում է, դուրս է եկել քարանձավներից, ձգտում ժողովրդավարության, ազատության, հավասարության․․․  

֊ Հարյուր հազարավոր տարիներ մարդկությունն այդպես է ապրել, դուք ուզում եք փոխե՞լ:

֊ Լավ, մեկ այլ հարց․ եթե դուք լինեիք հասարակությունից ինչ֊որ հատկանիշով տարբերող և հասարակությունը ձեզ վերաբերվեր այնպես, ինչպես դուք եք հիմա վերաբերվում ԼԳԲՏԻ անձանց, ձեզ ինչպե՞ս կզգայիք:

֊ Այո՛, այդ հասարակությունը կարող էր ինձ հանել ու շպրտել այն կողմ: Պետք չի, որ ես ինձ լավ զգամ: Հիվանդ մարդու լավ զգալու ու վատ զգալու մասին ի՞նչ իմաստ ունի խոսել: Հիվանդ մարդը հիվանդ է։ Դու վիրուս ես, հասկանո՞ւմ ես։ Պատկերացրեք՝ վիրուսը մեր շուրջ պտտվում է, մենք ասում ենք՝ այս վիրուսին օտարացրե՛ք, որ ես չհիվանդանամ, և դուք ասում եք՝ վիրուսը նեղացավ, վիրուսի իրավունքները խախտեցիք: Դուք հասկացա՞ք, թե դուք ինչ եք ասում:

֊ Դուք ԼԳԲՏԻ մարդկանց հիմա էլ վիրուսի հետ եք համեմատում:

֊ Հա բա, հարյուր, հազարվոր տարիներ այդպես է համարվել, հիմա՝ 21-րդ դարում եկաք և ուզում եք դա օրինականացնե՞ք: